سارة فوزى تكتب لـ«التحرير»: المرشح الرئاسي
بقلم : سارة فوزي
رغم معرفتنا بهوية رئيس مصر القادم إذا ترشح المرشح الرئاسي الأبرز والذي لم يُعلِمنا حتى الآن بترشيح نفسه من عدمه ورغم معرفتنا الحقة بأنه إذا ترشح هيركن باقي المرشحين على جنب ورغم أنه حتى الآن ترك الناس حائرين ومتساءلين هل يرشح نفسه أم يتركهم متشعلقين؟! ورغم كل "الرغمات دى" فسوف أسوق لحضراتكم ملخص أو كتالوج أو دليل إرشادي للصفات العشرة التي أتمنى أن تتوافر في أي رئيس مصري منتخب أو "جاي بالحب".
1. يمنع أي أغاني تتعمل باسمه أو لشخصه : لا تسلم الأيادي ولا الزبادي ولا اخترناك ولا واحد مننا ويطلع عين اللي جابونا كلنا فكفانا تطبيل ودعونا نخلق للعمل والإنتاج ألف سبيل ، ويا سلام لو يبقى رجلا بحق ويمنع تعليق صوره في المؤسسات والمدارس والمكاتب الحكومية كما لو كانت صورته ديكور أساسي في تلك المؤسسات تحس إن صورته بتطاردك أينما كنت زي بوسترات حازم أبو إسماعيل وحاليا سيادة المشير الجميل اللي في كل منطقة تلاقي صورته في ظل بحث الشعب عن زعيم "مش عادل إمام طبعا".
2. يحدد موقفه من الحد الأدنى والحد الأعلى للأجور : من أول لما وعيت على الدنيا وهما بيقولوا عايزين يعملوا حد أدنى وأعلى للأجور والحقيقة أنا لقيت الحد الأدنى الوحيد في حياتنا هو حياتنا نفسها اللي بقت رخيصة وملهاش اعتبار في حين أن الحد الأعلى بقى الإهمال والبيروقراطية الفجة والمسئولين اللي بيسرقوا وينهبوا وبيملوا كروشهم بالأموال وعلشان كده بيوظفوا فاسدين زيهم وحرامية تحتهم إلا من رحم ربي المهم إن ربنا يستر ولا تحمل لنا الأيام القادمة حدا أدنى من ذلك التدني اللي إحنا فيه !
3. يضع خطط استباقية للتعامل مع المشكلات والأزمات : المفروض إن الرئيس وكل المسئولين ومعاهم الشعب - الذي لا يُعفى من أي مسئولية أيضا - يتبنوا فكرة الوقاية خير من العلاج بدل ما هما لازقينها بس على أغلفة الكتب المدرسية بتاعت الوزارة ومحدش بيعمل بتلك النصيحة رغم أهميتها القصوى في بلد زي مصر اللي الموت فيها بقى له تشكيلة متنوعة وقائمة أوmenu تقدر تختار منها تحب تموت إزاي ؛ محروق ولا منفجر ولا في عاصفة ثلجية ولا في قطار ولا في أوتوبيس ولا في مظاهرة ولا في كوبري وقع بسبب أنبوبة بوتاجاز ولا في ماتش ولا في بيتك بسبب لميس الحديدي أو أحمد موسى!
4. نفسِي في رئيس ينحاز للشباب والأهم يستفيد من قدراتهم ويوظفها : حاسة إن في حد بيقرأ وبيقولي : "هأوو احلمي يا حلوة واتغطي كويس" نفسِي في رئيس يُقدِر الشباب ويعرف مداخلهم ويستقطبهم ويستغلهم في خدمة المشروعات الوطنية مش المشروعات المظاهراتية كأورق ضغط وقت اللزوم ويهتم بأدمغة وتطلعات وأفكار هؤلاء الشباب لأن الأيام الجاية بتاعهم حتى لا تشيخ الدولة وتهرم وإما الشباب دول يكبروا يستفيد بخبراتهم ويبحث عن شباب جدد لضخهم في ترسانة العمل بس مين يسمع؟؟ دولة عجائز وحتى الشباب فيها عجزوا بدري من الهم والغم والحزن ولأنهم دايما على دكة الاحتياط وحتى الدكة اتكسرت عليهم.
5. رئيسا للكل وليس للحاشية والحبايب : رئيس يحمي معارضيه قبل مؤيديه ..رئيس يساوي بين الجميع ..رئيس يحترم القانون ويعتبر نفسه مواطن وموظف وخادم لشعبه ..رئيس مش لحزبه أو للشوية اللي حواليه في قصر الرئاسة واللي غالبا بيضيعوه ..رئيس للمسلم وللمسيحي والشيوعي واليميني والاشتراكي والليبرالي والعلماني..رئيس نازل بكذا أوبشن مش أوبشن أنا حلو وطيب مع الحبايب والأهل والعشيرة والباقي ملهموش في التورتة الكبيرة ..رئيس تحترمه المعارضة كشخص قبل ما يحترمه الأنصار.
6. رئيس فاهم وعارف إن كلها 4 سنين ويمشي : يعني مش رئيس يلزق في الكرسي زي الصمغ السوداني إلى أن يفنى الله الأرض ومن عليها ، يعني لازم يشتغل ويحقق حاجات كتيرة خلال 4 سنين لو نفع وطلع كويس يدخل 4 سنين جداد لكن ما نفعش باي باي ويجي اللي بعده ، عايزين رئيس يفهم إن اسمه وصورته وإنجازاته للوطن وللشعب هي أهم شئ هتخلي الناس يخلدوه بحق في تاريخهم وقلوبهم مش يخلدوه ويقدسوه في الظاهر وفي الباطن يبصقوا على صوره وعلى شكله ويشتموه بالأم والأم.
7. رئيس لا يجعل مصر تابعة : يعني كفاية بجد كنَا تابعين خاضعين ذليلين لأمريكا وشكلنا علشان نغيظ ماما هنترمي في حضن بابا الكرملين الروسي ، كفاية إحنا عايزين نستقل وتبقى لينا سيادة إشمعن دول شيوخ النفط محدش يقدر يتدخل في شئونهم؟ ولا إحنا اتكتب علينا نعيش عبيد لأننا ملناش ضهر قصدي ملناش آبار نفط ولا مصالح بره!! هو ليه مفروض علينا نعيش بمعونات ومساعدات وجو أديني وهات وهات ؟! متى تكون لدينا الاستقلالية في اتخاذ المواقف السياسية على الساحة الدولية ؟ متى نشعر بكوننا نسير باختيارنا ونقرر مصيرنا مش غيرنا بيختار وإحنا بنفذ زي الحمار؟!
8. بطل من مواقف وليس من ورق أوهتاف زائف : يعني بيحط خطط وبينفذها ، بيقدم وعود وبينفذها ، بيحط جداول زمنية وبيمشي عليها ، بيسمع الناس وبيحقق لها مطالبها ، بيحمي مقدرات الوطن وخايف عليها وبيتقي الله في مصر وشعبها ، بيدي مساحة للتعبير والحرية مفيش قمع أو كبت أو تكميم للأفواه ، مش بطل بالصور والأغاني وإحنا معاك ياريس وأنت دايما كويس !! البطل الحقيقي مواقف وأفعال مش شوية أغاني وحبة خطابات وأقوال.
9. رئيس لامركزي : يعني مش يركز مع العاصمة والمدن الرئيسية فقط ويسيب باقي المحافظات تعاني وتقاسي الويلات يعني بيساوي في اهتمامه واهتمام الدولة بتحديث كافة المدن المصرية مش المدن اللي تجي على مزاجه يا عنيا!
10. رئيس تبقى قوتنا هي نور عينيه : مش شرط نبقى نور عينيه ولا هو نور عينينا "ولا جو عمرو دياب ده" المهم إنه يبقى عارف إننا إن رأينا صلاحه فسوف نقف خلفه نشدد من أزره وندعمه كليا وإن أخطأ لا نور ولا قمر ولا شمس هيعرفوا يطلعوه من تحت إيدنا ، أرجو ألا نبحث عن الكلام المعسول ونترك الحبل والخزنة مفتوحة لغير المسئول ، لازم نلاقي رئيس يبقى خوفه مننا وعلينا هو نور يصحصحه ويفوَقه إما ينزلق في نفق الطمع فينا وفي ثروات مصر..
وببساطة تلك هي الصفات التي ارغب أن تتوافر بشدة في رئيسي أيا كان ..
البحث عنها صعبا ولكنه ليس بمستحيل ، فإذا أردنا لتلك الصفات أن تتوافر في رئيس مصر سوف تتوافر لأننا سوف نجبره على أن يتحلى بتلك الصفات شاء أم أبى ولا هو مش واخد باله إننا نور عينيه وممكن إما نزعل منه نحط عليه ولا إيه؟؟
